Novial/Hunde Lektione 5
Li Hunde de Inferne
[muokkaa | muokkaa wikitekstiä]Mortimer kontinua lekte:
”After ke les had voyaja tra un o du kilometres, les pasad mutone-farmere e klamad a lo ob lo had vida li chaso. Tamen li home esed tam foli pro timo ke lo apene poved parla. Ma finalim lo dikted ke ya lo had vida li hundes sekuent li desfelisi yuna. Lo dikted: ’Ma ultru me ha vida ke Hugo Baskerville pasad me sur sen nigri kavala e hintru esed tal hunde de inferne ke me prega ke lu non mey seku me.’
”Li ebri siniores kavalkad a devanu til ke li nigri kavala did veni galopant kun vakui sadle e arosat per blanki skume. Aftru les kavalkad proxim mutu , pro ke les tre timad. Kavalkant lentim ye ti manere les trovad finalim li hundes. Quankam kurajosi tipe de hunde, les ploretad timosim regardant angusti vale devan les.
”Tri ek li homes, li maxim kurajosis o forsan li maxim ebris, kavalkad en li angusti vale. Tand lu larjisad en larji spasie in kel sidad du grandi stones kel esed plasat da serteni oblivet popule de oldi tempes. Li lune lumad klarim vor li desfelisi yuna had fala, morit pro timo e fatigo. Proximu liad li cadavre de Hugo Baskerville. Apud li kadavre mordant li kole, stead sordidu: grandi, nigri bestie kun forme de hunde, ma plu grandi kam irgi hunde kel mortal home ha vida. Durant ke les regardad, lu did tonda eku li kole de Hugo Baskerville, after ke, kand lu turnad sen brulanti okules vers les, li tri homes kriad pro timo e kavalkad for, ankore kriant. On dikte ke un ek les morid ye ti sami nokte pro tu kel lo had vida e ke li du altris esed ruptet homes durant sen seteri vivos.”